हुम्लामा अत्यधिक रक्तश्राव भएकी २३ वर्षीया सुत्केरी महिलाको नेपाली सेनाको हेलिकप्टरमार्फत उद्धार

सुत्केरी भएपछि अत्यधिक रक्तश्राव भई स्वास्थ्य अवस्था जटिल बनेकी हुम्लाकी एक महिलालाई नेपाली सेनाको हेलिकप्टरमार्फत उद्धार गरिएको छ । नाम्खा गाउँपालिका–३, खलगाउँ निवासी २३ वर्षीया डीकि साङ्मु तामाङलाई थप उपचारका लागि नेपाली सेनाको ल्ब्–०६१ नम्बरको हेलिकप्टरमार्फत उद्धार गरिएको हो ।
जिल्ला अस्पताल हुम्लाले थप उपचारका लागि रेफर गरेपछि आज बिहान ११ः१५ बजे सुर्खेतबाट आएको नेपाली सेनाको हेलिकप्टर सिमकोट गाउँपालिका–५ स्थित सिमकोट विमानस्थलमा अवतरण गरेको थियो। त्यसलगत्तै बिरामीलाई उद्धार गरी बिहान ११ः२० बजे थप उपचारका लागि सुर्खेततर्फ लगिएको हो ।
उद्धारका क्रममा महिलासँग उनका श्रीमान् मुस्कान लामा र स्वास्थ्यकर्मी प्रज्वल बुढा पनि रहेका छन् । सुत्केरीपश्चात् अत्यधिक रक्तश्रावका कारण अवस्था गम्भीर बनेपछि समयमै थप उपचारको व्यवस्था गर्न हेलिकप्टरमार्फत उद्धार गरिएको हो।