नाम्खाको खगालगाउँस्थित विद्यालयमा झोला तथा फलामे कुर्ची र टेबल हस्तान्तरण

नाम्खा गाउँपालिका–३ खगालगाउँस्थित मोतीराम आधारभूत विद्यालयका विद्यार्थीलाई विद्यालय झोला वितरण गरिएको छ । साथै विद्यालयका लागि आवश्यक फलामे कुर्ची र टेबल पनि हस्तान्तरण गरिएको छ ।
नाम्खा गाउँपालिकाका अध्यक्ष प्रेमबहादुर लामाको उपस्थितिमा आयोजित कार्यक्रममा विद्यार्थीहरूलाई शैक्षिक सामग्री वितरण गर्नुका साथै विद्यालयको भौतिक व्यवस्थापनलाई सहयोग पुग्ने उद्देश्यले फर्निचर हस्तान्तरण गरिएको नाम्खा गाउँ पालिका अध्यक्ष लामाले जानकारी दिनु भएको छ । कार्यक्रममा विद्यालयका शिक्षक, अभिभावक, स्थानीय जनप्रतिनिधि तथा समुदायका व्यक्तिहरूको सहभागिता रहेको थियो ।
विद्यालय परिवारले उक्त सहयोगका लागि सहयोगदाता तथा गाउँपालिका अध्यक्षप्रति आभार व्यक्त गर्दै यस्ता सहयोगले दुर्गम क्षेत्रको शैक्षिक वातावरण सुधार गर्न महत्वपूर्ण योगदान पुग्ने विश्वास व्यक्त गरेको छ । विद्यालय व्यवस्थापन पक्षले आगामी दिनमा पनि विद्यालयको शैक्षिक गुणस्तर अभिवृद्धि, भौतिक पूर्वाधार विकास तथा विद्यार्थीको सिकाइ वातावरण थप प्रभावकारी बनाउन यस्तै सहयोग निरन्तर रहने अपेक्षा गरेको जनाएको छ ।