सुर्खेत। कर्णाली प्रदेशमा बालबालिका खोजतलास प्रदेश समन्वय केन्द्र सञ्चालनमा आएको छ। प्रदेश राजधानी सुर्खेतको वीरेन्द्रनगरमा उक्त केन्द्र सञ्चालनमा आएको हो।
प्रदेशका सामाजिक विकास मन्त्री घनश्याम भण्डारीले आइतबार औपचारिक रुपमा केन्द्रको उद्घाटन गरेका थिए। बालबालिकाको खोजतलासका लागि सहयोग पुग्ने उद्देश्यले आश्रयस्थलको रूपमा केन्द्र सञ्चालन गरिएको मन्त्री भण्डारीले जानकारी दिए।
कर्णाली प्रदेशमा बालबालिकाको खोजतलासको लागि टोलफ्री नम्बर १०४ मा सम्पर्क गरी समस्या टिपाउन सकिनेछ। खोजतलास समन्वय केन्द्रमा प्रहरी र नेपाल टेलिकमको सहकार्य रहेको छ भने सामाजिक विकास मन्त्रालय अर्न्तगत सञ्चालनमा रहने मन्त्री भण्डारीले जानकारी दिए।
बालबालिकाको संरक्षण र सम्वर्द्धनमा टेवा पुग्ने मन्त्री भण्डारीले विश्वावास व्यक्त गर्दै आगामी दिनहरूमा थप व्यवस्थित रूपले सञ्चालन गर्न प्रदेश सरकार प्रतिवद्ध रहेको बताए।
