सुर्खेत । प्रथम खुल्ला देउडा प्रतियोगिताको व्यानर राख्दै देउडा गायिका विपना सिंहले व्यङ्गात्मक शैलीमा शुभकामना दिएकी छन्। बिहिवार आफ्नो सामाजिक सञ्जाल फेसबुक पेज मार्फत उक्त शुभकामना दिएकी हुन्।
उनले लेखेकी छन्, “कार्यक्रम भव्य बनोस् शुभकामना छ। यद्यपि सुर्खेतकै खुल्ला मञ्चमा १४ बर्ष उमेरमै देउडा खेलेर पहिचान बनाएका म जस्तै कलाकारलाई व्यानर र आयोजकले बाटो छेकेउ बधाई छ । दर्शकको मनमा छँदैछु, खुल्लामञ्चमा उपस्थिति हुने गरेर अर्को कार्यक्रम जुर्ने नै छ।”
यता अर्का लाईभ देउडा गायक प्रकाश अधिकारीले पनि असन्तुष्टि पोखेका छन् । उनले लेखेका छन्, “पैसा, पाओर र पार्टी कि कसो । कर्णालीबाट हामिलाई माया गर्नुहुने भगवान रुपि दर्शक हरु ।” भन्दै कटाक्ष गरेका छन्।
यता प्रतियोगिता तथा सांस्कृतिक मेलाको व्यानरमा करिब २ दर्जन कलाकारहरुको फोटो टासेको छ। देउडा र दोहोरी क्षेत्रका कलाकारहरुको फोटो व्यानरमा मात्र सिमित हुन्छ कि सबै जना उपस्थित हुन्छन् , त्यो भने मेला सुरु भए पछि मात्र थाहा हुनेछ।
चैत्र १५ गतेबाट सुरु हुने भनिएको कार्यक्रम विविध कारण देखाउदै १६ गतेबाट सुरु गरिने आयोजकले जनाएको छ। साथै घण्टाघरको खुल्ला मञ्चमा हुने भनिएको कार्यक्रम सरेर आँखा अस्पतालको आडैमा रहेको सिटि हलमा हुने समेत जानकारी दिएका छन्।
