सिमकोट – हिमाली जिल्ला हुम्लामा पौने २७ लाख मूल्य पर्ने खाद्यान्न बराबरको छुटमा बिक्री बितरण गरिएको छ । खाद्य ब्यवस्था तथा ब्यापार कम्पनी लिमिटेडले सामाजिक उत्तरदायित्व र चाडपर्व लक्षित कार्यक्रम अनुसार लिमिटेडले जिल्लाभर सर्वसाधारणका लागि यो खाद्यान्न छुटमा बिक्री गरेको हो । चार महिना अवधिमा २६ लाख ७५ हजार ४५० रुपैयाँ बराबर मूल्यको खाद्यान्न छुटमा जिल्लाका सिमकोट शाखा र अदानचुली गाउँपालिकाको डिपो कार्यालय श्रीनगरबाट बिक्री गरिएको लिमिटेड हुम्ला शाखाका प्रमुख कृष्ण प्रसाद अधिकारीले बताए । लिमिटेडले यो खाद्यान्न विशेष गरि सामाजिक उत्तरदायित्वअन्तर्गत र चाडपर्वका बेला छुट दिने नियम अनुसार हुम्ला जिल्लामा पनि छुटमा खाद्यान्न बिक्री गरिएको छ । यो अवधिमा शाखा कार्यालय सिमकोटबाट सात हजार ४३४ दशमलव २५ क्वीन्टल र श्रीनगर डिपोबाट ४५८ दशमलव ७५ क्वीन्टल चामल प्रति केजी पाँच रुपैयाँ छुटमा बिक्री भएको उनले बताए । यो खाद्यान्न गत असोज ६ गतेबाट बिक्री सुरु भएर माघ २ गतेसम्म बितरण गरिएको थियो । यसमा प्रतिकेजी ९५ नब्बे पर्ने मसिनो चामल नब्बे रुपैयाँमा बिक्री गरिएको थियो भने ७४ रुपैयाँ प्रतिकेजी पर्ने सोना मोटो चामल ६९ रुपैयाँमा बिक्री गरिएको थियो। त्यसैगरि अरुवा मोटो ६६ रुपैयाँ प्रतिकेजी पर्ने चामलको ६१ रुपैयाँमा बिक्री गरिएको थियो । त्यसैगरी, यो अविधमा प्रतिकेजी सात रुपैयाँ छुटमा छ हजार ३५० लिटर खाने तेल र पाँच रुपैयाँ छुटमा ७१ क्वीन्टल चिनी पनि सर्वसाधारणलाई बिक्री गरिएको प्रमुख अधिकारीले बताउनुभयो। तीन किसिमका खाद्यान्नमा छुट पाएपछि सर्वसाधारणले राहत महशुस गरेको उद्योग बाणिज्य सङ्घका अध्यक्ष रामबहादुर भण्डारीले बताए । बिकट र हालसम्म सडक सञ्जाल नजोडिएको जिल्ला भएको कारण यस्तो छुटको ब्यवस्थालाई नियमित गर्न उनले लिमिटेडलाई आग्रह गरे ।
